Wednesday, December 29, 2010

“ခင်ပွန်းရဲ့လက်ရာ၊ အားလပ်ရက် ဟင်းလျာ”

 စာရေးဆရာတစ်ယောက် သူလုပ်နေတဲ့ Project မှာ အလွန် အလုပ်များနေတာကြောင့် တစ်နှစ်လုံး ခွင့်မယူဘဲ နေလာလိုက်တာ နှစ်ကုန်ခါနီးမှာ ခွင့်ရက်တွေ အများကြီး ကျန်နေပါတယ်။ Project က အလုပ်တွေလည်း ပါးလာတာကြောင့် နောက်နှစ်ထဲ သယ်ခွင့်မရှိတဲ့ ခွင့်တချို့ကို ရှင်းပစ်ဖို့ သူ့ အထက် အရာရှိကလည်း တိုက်တွန်းလာတာကြောင့် ခွင့်လက်ကျန်ရှင်းတဲ့ အနေနဲ့ ဒီတစ်ပတ်လုံး ခွင့်ယူလိုက် ပါတယ်။ တခြားကျန်တဲ့ ခွင့်ရက်ကိုတော့ နောက်နှစ်ရမယ့် ခွင့်ရက်နဲ့ ပေါင်းဖို့ ချန်ထားလိုက် တယ်။ ခွင့်ယူထားတော့ သူလည်း ဒီတစ်ပတ်လုံး အနားရနေတာပေါ့ရှင်။

မနေ့ကတော့  စာရေးဆရာက ပြောလာပါတယ်။ အမြဲတမ်း ကျွန်မချက်ကျွေးတာကို သူစားနေရတာ၊ ခွင့်ရတုန်း သူချက်တတ် သလောက် ချက်ကျွေးချင်တယ်တဲ့၊ ကျွန်မ အနားယူပါတဲ့လေ။ ကျွန်မက ဖြစ်မှ ဖြစ်ပါ့မလားပေါ့။ သူက သူ့မိဘအိမ်မှာတုန်းက ကြက်ဥတစ်လုံးတောင် မကြော်ဖူးဘူးလို့ သူ့မိခင်၊ ကျွန်မယောက္ခမ ပြောဖူးလို့ သိထားတော့ နည်းနည်းတော့ လန့်ပါတယ်။ သူက ဖြစ်ပါတယ်တဲ့၊ ကျွန်မ ဒီလိုက်မလာခင်တုန်းက သူ့ဘာသာ ချက်စားတာ ဖြစ်နေတာပဲတဲ့။ စားလည်း စားကြည့်ပါဦး တဲ့လေ။ အဲ - နောက်တော့ ပြောသေး တယ်။ သူချက်နေတုန်းတော့ အနားမှာ လာမရှုပ်နဲ့၊ ဆရာ လာမလုပ်နဲ့တဲ့။ သူက သူ့ Method နဲ့ သူ ချက်မှာ ဆိုပဲ။ တကယ်လည်း ကျွန်မ ၀င်ပြောခွင့်ကို မရပါဘူး။ သူ ဟင်းချက်နေတုန်း မီးဖိုထဲကို ကွန်ပျူတာလေး ယူသွားပြီး အနားမှာ သွားထိုင်နေတာ တောင် သိပ်မကြိုက်ချင်ဘူး။ ဘာမှ လာမပြောနဲ့နော် ဆိုပြီး ကျွန်မကို ထပ် ဟန့်လိုက်ပါသေး တယ်။ ဒီတော့ ကျွန်မလည်း ဘာဆို၊ ဘာမှ ဆရာလုပ်ခွင့်မရဘဲ သူဟင်းချက်နေတုန်း ငြိမ်ငြိမ်လေး ထိုင်ပြီး ဟိုဘလော့၊ ဒီဘလော့ လည်နေလိုက်ပါတယ်။

သူက ၀က်သားဟင်း ချက်ကျွေးတာပါ။ ကျွန်မမှာလည်း အစားရှောင်နေရတော့ ၀က်သားနဲ့ ကြက်သားပဲ တစ်ရက်ခြားစီ စားနေရတာကိုး။ ထမင်းအိုးလည်း သူပဲ တည်ပါတယ်။  ဟင်းလည်း ကျက်ရော လာမြည်း ကြည့်ဦး ဆိုတာနဲ့ ကျွန်မလည်း မြည်းကြည့်တယ်။ စာရေးဆရာက ဘယ်ဆိုးလို့လဲရှင့်။ စားကောင်းတယ်။ ကျွန်မဖြင့် အစက ဒီလောက်စားကောင်း လိမ့်မယ်ကို မထင်ဘူး။ ဟင်းပျက်သွားရင် လက်ဖက်သုပ်နဲ့ စားရမလား၊ ကြက်ဥကြော်နဲ့ စားရမလား စဉ်းစား နေတာ။ တကယ်ချက်ပြီးတော့ မဆိုးဘူးပြောရမယ်။ (ဟဲဟဲ- ကျွန်မကိုတော့ ဘယ်မီပါ့မလဲနော် :-P)။  သူ့ချက်နည်းကိုတော့ ပြောမပြနိုင်ဘူးဆိုဘဲ။ ၀က်သားကို အချဉ်နဲ့ ချက်တာ မဟုတ်ဘဲ၊ ရိုးရိုးဆီပြန် ချက်တာဆိုတော့ နည်းနည်းတော့ အီတယ်။ ကျွန်မက ၀က်သားဟင်း တစ်မျိုးတည်းလား။ အကြော်လေး ဘာလေး မပါဘူးလား ဆိုတော့၊ အကြော်တွေ ဘာတွေတော့ မတတ်ဘူး။ ကိုယ့်ဘာသာ ကြော်လေတဲ့။ ဒီတော့ ကျွန်မလည်း မှိုကြော်မယ်ပေါ့။ ၀က်သားဟင်းက အီမှာဆိုတော့ အအီပြေအောင် မှိုကို မကြော်တော့ဘဲ သံပုရည်ရည်ညှစ်ထည့်၊ ငရုတ်သီးစိမ်း လှီးထည့်ပြီး  အရည်လေးနဲ့ ချက်လိုက် တယ်။  တော်သေးတယ်ရှင့်။ မှန်သွားတယ်။ မှိုချဉ်စပ်လေးကြောင့် အအီပြေသွားတယ်။ 

မနေ့ညက ထမင်းစားကောင်းတာနဲ့ ဟင်းချက်ကောင်းလိုက်တာ၊ ၀က်သားဟင်းလေး အရမ်းစားကောင်း တာပဲ လို့ ပြောလိုက်တာ၊ ဒီမနက်တော့ Breakfast အတွက် ထမင်းကြော် ကြော်ကျွေးမယ် လုပ်ပြန်ပါတယ်။  အရင်တုန်းကလည်း ထမင်းကြော် ကြော်ကျွေးမယ်လို့ ခဏခဏ ပြောဖူးပါသေးတယ်။ ခုတော့ အခွင့် သင့်သွားတာပေါ့။ ထုံးစံအတိုင်း သူချက်နေရင် ဆရာလာမလုပ်နဲ့ဆိုတော့ ကျွန်မလည်း အိပ်ခန်းထဲမှာပဲ နှပ်နေလိုက်ပါတယ်။ ထမင်းကြော်ရပြီဆိုမှ ပန်းကန်လေး ပြေးယူတော့၊ အမယ် - ရှယ်ပဲ။ ထမင်းကို ပဲပြုတ်၊ ပြောင်းဖူးစေ့၊ ကြက်ဥ တွေနဲ့ ရောကြော်ထားပြီး၊ ကြက်ဥ အကာကျက် တစ်လုံးစီလည်း ထမင်းကြော်ပေါ်မှာ တင်ထားသေးတယ်။ စားတော့မှ သိရတာက ကြက်သွန်နီ ဆီသပ်နဲ့ ကြော်တာမဟုတ်ဘဲ ကြက်သွန်ဖြူကို ပါးပါးလှီးပြီး ကြော်ထားတာပဲ။ စားလို့တော့ ကောင်းသားရှင့်။ ကျွန်မမှာ မနက်စာကို ဘယ်တော့မှ များများ မစားတတ်ဘူး။ စာရေးဆရာ ထမင်းကြော် ကြော်ကျွေးတဲ့နေ့မှပဲ ထမင်းကြော် တစ်ပန်းကန်လုံး ကုန်သွား ပါတယ်။ သူက ပြောသေးတယ် သူ့လက်ရာကောင်းလို့ အများကြီးစားနိုင်တာတဲ့။ ကျွန်မကလည်း သူ့ကိုပြန်စ လိုက်ပါတယ်။ ထမင်းကြော် ကောင်းလို့ မဟုတ်ဘူး။ ဗိုက်အရမ်းဆာအောင် အဆာခံပြီးမှ စားရလို့ အကုန်ဝင် သွားတာလို့ :-) ။ ကိုယ့်ငါးချဉ် ကိုယ်ချဉ်တယ်လို့ မထင်နဲ့နော်။ တကယ်ကောင်းတာပါ။ ကျွန်မလည်း တော်တော် အပင်ပန်း သက်သာ သွားပါတယ် :-P

စာရေးဆရာချက်တဲ့ ၀က်သားဟင်းလေးပါရှင်။ အထူးစပယ်ရှယ်မို့ ပုံများများတင်လိုက်ပါတယ်။








ကျွန်မချက်တဲ့ အအီပြေ မှိုချဉ်စပ်ဟင်း



ဒါလေးက စာရေးဆရာလက်ရာ မနက်စာ ထမင်းကြော်




ကျွန်မက ကြက်ဥအနှစ်ပေါက်သွားရင် မကြိုက်လို့ အနှစ်မပေါက်တဲ့ ပန်းကန်ကို ကျွန်မစားပါတဲ့ :-)



4 comments:

rose said...

ဘယ်ဆိုးလို့လဲနော်.... ပါရမီဖြည့်ဖက်လေးရဲ့ စာရေးဆရာက... ပာင်းချက်ကောင်းသားပဲ။ ကောင်းတယ် နောက်ဆို သူ ချက်တာ အရမ်းကောင်းတယ်လို့ ပြော။ ဒါဆို ကိုယ် အနားရတာပေါ့ ခစ်ခစ်း)

Sunny said...

စာရေးဆရာ ဟင်းချက်ကောင်းတော့ ညလေး အနားရတာပေါ့.. ပုံတွေကြည့်ရင်းနဲ့တောင် ဗိုက်ဆာလာပြီ..

ငွေစန္ဒာ said...

ညီမရဲ့စာရေးဆရာကတော်လိုက်တာ ချက်ထားတာစားချင်စရာ
rose ပြောသလိုပဲအရမ်းစားလို့ကောင်းတယ်လို့သာပြောလိုက်

baby taster said...

ကယ် လာစားပြီ ဘာရှိသေးလဲ
ကျန်တော့ဖူးလား ၀က်သားဟင်း
စားဖူးနော်နောက်တခါ ကြက်သားချက် :)

Post a Comment

ကျွန်မအတွက် အမှတ်တရစကားလေးတွေ ချန်ထားပေးခဲ့လို့ ကျေးဇူးပါနော်.....

Related Posts Plugin for WordPress, Blogger...