“ရိုးရိုးလေး ဟင်းတစ်ခွက်”

စာရေးဆရာဆီ လိုက်လာပြီးကတည်းက ၀က်သား၊ ကြက်သား၊ ကင်းမွန်၊ ပုဇွန် ဒီလေးမျိုးပဲ လည်နေတာ။ ဖြစ်ချင်တော့ ကျွန်မက ပင်လယ်စာနဲ့ မတည့်တဲ့ ရောဂါရှိတယ်။ ပင်လယ်စာများ စားလိုက်ပြီဆို လက်တွေ၊ ခြေတွေမှာ ယောင်ကိုင်း တက်လာရော။ လူကြီးတွေကတော့ သွေးမှင် လို့ပြောတယ်။ ဗမာ အယူအဆပေါ့။ အနောက်တိုင်း ဆရာဝန်က သွေးပြန်ကြောပိတ်တာ၊ Allergy လို့ပြောတယ်။ ငယ်ငယ်ကတည်းက ခဏခဏ ဖြစ်တတ်ခဲ့တာ။ ဒါပေမဲ့ ရန်ကုန်မှာ က ရေချို ငါး၊ ပုဇွန် ဆိုတော့ ဖြစ်ခဲတယ်။ ဒီက ငါးပုဇွန် တွေက ပင်လယ်ငါး ပုဇွန်တွေ ဆိုတော့ ခဏခဏ စားတိုင်း ဖြစ်နေရော။ ဖြစ်ပြီဆို ခြေထောက်မှာ ဖြစ်ရင် လမ်းက လျှောက်လို့ မရတော့ဘူး။ ဒါကြောင့် နောက်ပိုင်း သိပ်မစားရဲ တော့ဘူး။ ရံဖန်ရံခါမှပဲ ချက်ဖြစ်တယ်။ ပင်လယ်စာ တတ်နိုင်သလောက် ရှောင်ကြတယ်။ ကိုယ်ကရှောင်တော့ စာရေးဆရာလည်း ရှောင်ရတာ ပေါ့။ ဒါကြောင့် တစ်နေ့တစ်နေ့ ချက်စရာက ကြက်သားနဲ့ ၀က်သားပဲ ကျန်တော့ တယ်။

အရင်ရက်တွေက အသားဟင်းတွေပဲ ချက်ဖြစ်နေတော့ ဒီနေ့တော့ မစားချင်တော့တာနဲ့ ကြက်ဥကြော်စား ပါတယ်။ ကြက်ဥကို ဆူးပုတ်ရွက်နဲ့ ကြော်တာပါ။ ငယ်ငယ်က အိမ်မှာ အဘွားက ခဏခဏ ကြော်ပေးတတ် ပါတယ်။ နောက်ပြီး အရည်သောက်လေး ချက်မယ်စိတ်ကူးတယ်။ စာရေးဆရာက ထမင်းစားရင် အရည် မပါရင် မစားတတ်သူပါ။ အိမ်မှာ ဘာရှိလဲ ကြည့်တော့ ရန်ကုန်က အမေပို့ထားတဲ့ Tom Yum အနှစ်ထုပ် လေးတွေ ရှိနေတာနဲ့ Tom Yum ဟင်းလေး ချက်ဖြစ်ပါတယ်။ (ဒီမှာ Tom Yum အနှစ်ဘူး တွေ တွေ့ပေမယ့် ရန်ကုန်မှာကတည်း က စားနေကျလည်းဖြစ်၊ အရသာလည်း ကြိုက်တဲ့ တံဆိပ်ကို အမေက ထည့်ပေးလိုက်လို့ပါ)။ Tom Yum လေးဆို ပုဇွန်လေးနဲ့ ချက်မှ ကြိုက်တာ ဆိုတော့ ဟိုးလွန်ခဲ့တဲ့ ရက်တော်တော် ကြာကြာ (နောက်ဆုံးအကြိမ် မှင်မဖြစ်မှီ) က၀ယ်ထားတဲ့ ပုဇွန်လေး နည်းနည်း ကျန်တာနဲ့ ထည့်ချက်လိုက် ပါတယ်။ တစ်ကောင်နှစ်ကောင် လောက် စားတာတော့ ခြေလက်တွေ မယောင်လောက်ဘူး ထင်ပါရဲ့နော် :-P ။ တစ်လက်စတည်း စာရေးဆရာ အကြိုက် ချဉ်ပေါင်ကြော်လေးလည်း ကြော်ထားလိုက် ပါတယ်။ သူက သိပ်ကြိုက်တယ် လေ။ ဘာဟင်းနဲ့ ထမင်းဘူး ထည့်ပေးပေး ချဉ်ပေါင်ကြော် လေး ပါရင် ပိုစားကောင်း တတ်ပါတယ်။

 

ဒီလိုနဲ့ပဲ ရိုးရိုးလေးဟင်းတစ်ခွက်တွေ ဖြစ်လာခဲ့ပါတယ်။

ဒါကတော့ Tom Yum ဟင်းထဲ ထည့်မယ့် အဆာပလာတွေပါ။

ဒါလေးကတော့ စာရေးဆရာနဲ့အတူစားမယ့် ညစာအတွက် Tom Yum ဟင်းတစ်ခွက်ပေါ့။

ဒါကတော့ ကြက်ဥကို ဆူးပုတ်ရွက်နဲ့ ကြော် ထားတာပါ။ စားခါနီး ပူပူနွေးနွေး ကြော်စားပါတယ်။

ဒါလေးက စာရေးဆရာ နောက်ရက်တွေ စားဖို့ သူ့အကြိုက် ချဉ်ပေါင်ကြော်လေးပါ။ ဒီလိုလေး ဘူးလေးနဲ့ ထည့်ထား ပေးလိုက်ရင် လေးငါးရက်တော့ စားရော။